Aurea luce et decore roseo,

lux lucis, omne perfudisti saeculum,

decorans caelos inclito martyrio

hac sacra die, quae dat reis veniam.

 

lanitor caeli, doctor orbis pariter,

iudices saecli, vera mundi lumina,

per crucem alter, alter ense triumphans,

vitae senatum laureati possident.

 

O Roma felix, quae tantorum principum

es purpurata pretioso sanguine,

non laude tua, sed ipsorum meritis

excellis omnem mundi pulchritudinem.

 

Olivae binae pietatis unicae,

fide devotos, spe robustos maxime,

fonte repletos caritatis geminae

post mortem carnis impetrate vivere.

 

Sit Trinitati sempiterna gloria,

honor, potestas atque iubilatio,

in unitate, cui manet imperium

ex tunc et modo per aeterna saecula.

Amen.