Paulus Papa V
Ad perpetuam rei memoriam
Ecclesiae militantis regimini, auctore Domino, nullo suffragio meritorum, praesidentes, ex iniuncti nobis officii debito providere tenemur, ut, qui sub beati Francisci vexillis, qui inter strenuos Christi duces gloriae splendore coruscat, in huius vitae militia sub strictioris eiusdem beati Francisci regula disciplinae Altissimo obsequium praestant, et per corporis castigationem, per divitiarum contemptum, suique ipsius abnegationem, ieiuniis, orationibus, sacris praedicationibus, aliisque religiosis operibus vacantes, verbo et exemplo veros sese beati Francisci imitatores et germina ostendunt, tales ab omnibus absque ulla controversia habeantur.
§ 1. Cum itaque, sicut accepimus, a nonnullis revocetur in dubium, an fratres Ordinis eiusdem sancti Francisci Cappuccini nuncupati, sint vere fratres Minores, et etiam, quoniam regulam sancti Francisci instituti non fuerint, pariterque an eorum constitutiones aliquid habeant, quod regulae sancti Francisci repugnet;
§ 2. Nos dubia huiusmodi apostolicae declarationis oraculo decidere cupientes, cum venerabilium fratrum nostrorum S. R. E. cardinalium Concilii Tridentini interpretum consilio, matura deliberatione habita, hac nostra perpetuo valitura constitutione, auctoritate apostolica, declaramus, fratres Cappuccinos esse vere fratres Minores, ac etiam (quamvis tempore sancti Francisci minime instituti fuerint, cum tamen eius regulam profiteantur, atque eorum instituta congruant tam regulae statutis, quam eiusdem reguae declarationibus, quae habeantur in constitutione felicis recordationis Clementis Papae V praedecessoris nostri in generali Concilio Viennensi edita, quae incipit: Exivi de Paradiso) filios S. Francisci [...].
Datum Romae apud S. Marcum, sub annulo Piscatoris die XV octobris MDCVIII pontificatus nostri anno IV.
Dat. die 15 octobris 1608, pontif. an. IV.
Cfr. Bullarium Romanum, XI, taurinensis ed., Augustae Taurinorum 1867, 552-553.
